"Этне күзәтү" тирә - юнь белән танышу (уртанчылар төркеме)

Максат: Балаларның эт турында күзаллауларын киңәйтү: күзләре түгәрәк,сизгер колаклар,үткен тешләре,тәпиендә тырнаклар,гәүдәсе куе йон белән капланган.Этләрнең төрлелеге: зур,кечкенә,куе йонлы,озынча,һ.б.булулары.Акыллы хайван,кешегә хезмәт итә.Ул тере,йорт хайваны: ашый,эчә,сулый,үрчи.Сыйфатлар кулланып,сүзлек байлыгын үстерү: шома,куе,үткен,йонлач.Балаларда этләргә карата мәхәббәт,сак караш тәрбияләү.

Материал:Төрле ашамлыклар,ипи,сөяк,яшелчәләр.Этләр сүрәтләнгән рәсемнәр.

Барышы: -Балалар,хәзер мин сезгә табышмак әйтәм,ә сез җавабын әйтерсез.

-кешенең дусты, Йортның сакчысы,ул нәрсә? (эт)

Бер малай үзенең эте белән керә.

Малай: Минем этемнең исеме Акбай.Ул инде зур,ә кечкенә балаларны бик ярата.

Тәрбияче:Аңа игътибар белән карыйк.Бигрәк матур эт.Кайсыгыз кыюрак,якынрак килеп карагыз.Ул сезнең белән үзенең тәпиен биреп тә исәнләшә.Акбайның күзе нинди зур,ничек сезгә игътибар белән карап тора.Аның башы нинди?Башында нәрсәләр бар?Колаклар ни өчен кирәк? Айнур,синең этен нишли белә?

Малай: Бу хезмәт итүче эт.Акбайның колаклары сизгер,бөтен тавышларны ишетә,өйне саклый,боерык биргәнне аңлый.Мин читкә китеп,Акбай,минем янга кил дисәм,ул килә.

Тәрбияче:Балалар, Акбай нишләде? Өлкәннәр һәм балалар этләрдән куркалар.Ни өчен? Акбайның тешләре нинди?(үткен,зур). Аңа андый тешләр ни өчен кирәк?(сөяк кимерергә,хуҗасын сакларга). (Өстәлдән сөяк алып эткә бирү).

-Ул ни өчен сөякне бик тиз тапты?(борыны сизгер)

Малай:Акбай сөякне генә түгел,минем әйберләрне яшерсән бик тиз табып бирә.

Тәрбияче:Акбай бик акыллы,ул нинди төстә?Кайсыгызның этне яратасы,сыйпыйсы килә?Аның йоны нинди?Аның койрыгы нинди?

Малай:Акбай шатланганда,койрыгын селкетә.

Тәрбияче:Акбайның тәпиләре нинди?(Эт йөреп күрсәтә).Нинди хайван тавышсыз гына йөри?Акбай зур этме,әллә кечкенәме?Каян белдегез?(Айнур эте турында рәсемнәр күрсәтә,алар турында сөйли)

Тәрбияче:Акбай тереме?(йөри,ашый,күрә,тыңлый,сулый,үсә)

Малай:Мин аңа боерыклар бирәм,ул аны үти.(Айнур үзенең ничек боерыкларны үтәргә өйрәтүе турында сөйли).(Рәхмәт әйтү,рәсемнәр карау,сораулар бирү һәм җаваплар алу).