Фигыль темасын гомумиләштереп кабатлау. 4 класс

Класс: 4 нче класс Тема: Фигыль Дәрес темасы: “Фигыль” темасын гомумиләштереп кабатлау. Дәрес тибы: белемнәрне тирәнәйтү, системалаштыру дәресе. Метод һәм алымнар: әңгәмә, өлешчә эзләнү, мөстәкыйль эш. Максат: 1) укучыларның фигыль турында алган белемнәрен ныгыту, тулыландыру, системалаштыру; 2) өйрәнелгән кагыйдәләрне практикада куллана белүләренә ирешү, фикерләү сәләтен, иҗади активлыкларын арттыру; 3) укучыларда язучы А. Хәлим иҗатына карата кызыксыну уяту, шигырьләренә нигезләнеп, хезмәт сөючәнлеккә уңай караш тәрбияләү. Җиһазлау: индивидуаль карточкалар, тест сораулары, модуль схемасы, мультимедиа проектор, компьютер, А. Хәлимнең “ Биктырыш” , “ Казлар көткәндә”, “ Кыяр караклары” китаплары. Дәрес “Фигыль” темасы буенча грамматик материалларны кабатлауны, сөйләм телен үстерүне, сәнгатьле уку күнекмәләрен камилләштерүне эченә ала. Дәреснең эчтәлеге укыту программасына туры килә һәм алдагы дәрес материалларына таянып, слайдлар аша үткәрелә. Дәрес барышында : фронталь, индивидуаль, парлап эшләү, дифферинциаль, мөстәкыйль эш алымнары кулланыла. Дәрестә укучыларның активлыгын тоту эзләнүле(эвристик) сораулар кую аша оештырыла.Текстлардагы проблемалар укучыларның яшьүзенчәлекләренә, кызыксыну даирәләренә йөз тота. Әдәби текстлар( табышмак, шигырьләр) аутентив характерда: анда укучыларга таныш күренешләр( авыл, чык төшү, баланың китап укырга теләге), тормышчан ситуация (әби белән онык мөнәсәбәте). Дәрес Ә.З. Рәхимовның үстерешле уку технологиясенә нигезләнеп төзелә, дәреснең структур этаплары үзара тыгыз бәйләнеп, белемнәрне модульләштерүгә корыла. Күнегүләр системасы билгеле бер тәртиптә һәм эзлеклелектә, гадидән катлаулыга таба бирелә. Дәрес конспектын башлангыч сыйныф, рус мәктәпләренең 5-6 сыйныф татар төркеме укытучылары һәм факультатив дәресләрдә куллана ала.
Автор: Сагитова Аниса