«Галимҗан Ибраһимовның тормыш юлы һәм иҗаты. “Яз башы” хикәясе»

“ Г.Ибраһимовның тормыш юлы һәм иҗаты. “Яз башы” хикәясе” темасына дәрес-презентация. Әлеге дәрес конспекты рус мәктәпләренең 5 нче сыйныфында укучы татар балаларына татар әдәбияты дәресе үткәрү өчен төзелде.

Дәрес түбәндәге максатларны үз эченә ала:

1. Язучы биографиясе белән таныштыру һәм иҗаты турында гомуми күзаллау булдыру.

2. «Яз башы» хикәясенә кызыксыну уяту, аны әдәби телдә үзләштерү.

3. Язучы иҗатына мәхәббәт уяту.

4. Туган як табигатенә сакчыл караш тудыру.

Җиһазлау: Г.Ибраһимовның портреты, китаплар күргәзмәсе, компьютер, слайдлар, методик ярдәмлек.

Дәрес тибы: Яңа материалны үзләштерү һәм алган белемнәрне ныгыту.

Дәреснең структурасы түбәндәгеләрдән гыйбарәт:

I. Оештыру.

1) Укучылар белән исәнләшү, дәрескә әзерлекләрен тикшерү.

2) Дәрестә кулланырга тиешле кагыйдәләрне искә төшерү.

3) Уңай психологик хәләт булдыру.

II. Актуальләштерү.

1) Өй эшен тикшерү;

2) Мәкальләр белән танышу.

3) Яз турында әңгәмә.

4) Дәреснең темасы һәм максаты белән таныштыру.

III. Яңа теманы үзләштерү. Галимҗан Ибраһимовның тормыш юлы һәм иҗаты.

“Яз башы” хикәясе.

1) Истәлекләр уку.

2) Портреты өстендә эшләү.

3) Биографиясе белән танышу.

4) Ял минуты.

5) Сүзлек белән эш.

6) Әсәрне чылбыр рәвешендә уку.

V. Белем һәм күнекмәләрне ныгыту. Укылган бүлек эчтәлеге буенча сорауларга җавап бирү.

VI. Йомгаклау. Дәрескә нәтиҗә ясау.

VII. Билгеләр кую.

VIII . Өй эше.

Г. Ибраһимовның биографиясен укып, эчтәлеген сөйләргә әзерләнергә, үзегезгә ошаган бер эпизодка иллюстрация ясап килергә.

Дәрес-презентация мультимедиапроектор кулланып үткәрелә.

Беренчедән, бу дәрес укыту процессында татар әдәбияты дәресендә ИКТ куллану мәсьәләсен тормышка ашыру булып тора.

Икенчедән, компьютер технологиясен куллану читтән торып экскурсиядә булу шартлары тудыра, укучыларда язучының тормышы һәм иҗаты белән чынлап торып кызыксыну уята. Төсле рәсемнәр урнаштырылган слайдлар Г.Ибраһимовның табигатьне сурәтләү осталыгын тоярга һәм тел байлыгын танырга; табигатьнең матурлыгына игътибар итәргә, аны яратырга өйрәнергә; әсәрнең эчтәлеген безнең әйләнә-тирәбездәге чынбарлыкка бәйләргә, шул мохитта үзләренең урыннарын билгеләргә ярдәм итә.