Һәр гаилә-үзе бер тарих

Тема: Һәр гаилә-үзе бер тарих

Максат: Әти-әнигә хөрмәт, ихтирам тәрбияләү. Гаилә һәм мәктәпнең бердәмлеген ныгыту, балаларны гаилә традицияляренә җәлеп итү.

Җиһазлау: Стендгазеталар, плакатлар аудио касеталар, дисклар, магнитофон, карточкалар, сораулар.

Алып баручы: Хөрмәтле, әти-әниләр! Кадерле балалар, кунаклар! Бүген без сезнең белән “Һәр гаилә-үзе бер тарих” исеме астында Гаилә бәйрәменә җыелдык.

Гаилә-тормышыбызның нигезе. Гаилә нык, тату икән, димәк, дәүләт тә, җәмгыять тә нык, тату дигән сүз. Әти-әни аның тоткасы булса, балалар-гаиләнең көзгесе. Әгәр тотка купмасын, көзге ватылмасын дисәң бер-берегезне саклап, рәнҗетми, хөрмәт белән яшәргә кирәк! Без бүгенге кичәбезгә әти-әниләрне чакырдык. Алар белән бергәләп без бүген рәхәтләнеп ял итәрбез.

Дамир : “Җирдә миңа ни кирәк?”

Җирдә миңа ни кирәк?

Әти дә, әни кирәк!

Җирдә миңа ни кирәк?

Без яшәгән өй кирәк!

Җирдә миңа ни кирәк?

Әллүкиле көй кирәк!

М Җирдә миңа ни кирәк?

Тукай туган тел кирәк!

Җирдә миңа ни кирәк?

Туган-үскән ил кирәк!

Җирдә миңа ни кирәк?

Мәңге имин Җир кирәк!

Алып баручы: Нәрсә соң ул гаилә? Гаилә-тормышыбызда иң изге урын ул. Анда без яраткан, үрнәк алган, кайгыртучанлык күрсәткән якын кешеләр яши. Гаилә мәхәббәте, бер-береңә хөрмәт күрсәтү, йолаларны саклау белән көчле.

Гаилә ул-җылы учак. Менә без бүген бәйрәмебез түренә учак җылысы бөркелеп торган гаиләләрне чакырдык. .

Алып баручы: Һәр гаиләнең үз традицияләре, үз бәйрәмнәре бар, аларны һәркем үзенчә үткәрә. Бәби туйлары, баланың беренче мәртәбә “әннә”, “әттә” дип эндәшүе, тәпи басып китүе, балалар бакчасына, мәктәпкә йөри башлавы һәр гаиләгә бетмәс-төкәнмәс бәхет, шатлык китерә. Бу бәхетне, шатлыкны без барыбыз да үзебезнең башыбыздан кичердек дисәк ялгыш булмас. Менә безнең арада да “Иң яшь гаилә” ләр бар. Бу кичерешне алар әле яңа гына башларыннан уздырдылар.Менә алар: Батыршиннар һәм Бариевлар гаиләсе Беренче тапкыр балаларыгызны мәктәпкә озатканда сез нинди хисләр кичердегез? Шул турыда берничә сүз: (Әти-әниләренә сүз бирү).

Уен: “Шар уены”

Сораулары: Сезнең гаиләдә кем баш?

Кем күбрәк йокларга ярата?

Кем акчаны күбрәк алып кайта?

Ә хәзер сезнең өчен бию (Капитошка).

Алып баручы: Арабызда 3-5 бала тәрбияләп үстерүче гаиләләр дә бар.Авырлыклардан куркып 2 бала белән генә калучы гаиләләр күп. Ә менә безнең арабызда тәвәккәл гаиләләр дә бар.Менә алар.(слайдлар)( Җәләлиевлар, Нәҗиповлар, Закирҗанова, Салихҗановлар) Әйдәгез, сезне бирегә чакырабыз. Күп балалы гаилә буларак, безнең аларга бер ничә соравыбыз бар:

“Ишле гаилә тормышының уңай һәм кыен яклары нинди?” (Ата-аналарның җаваплары).

Уен: “Ир-ат өстенме, хатын-кызмы?”

Сораулары:2013 елгы универсиада кайсы шәһәрдә үткәрелә?

Әлеге универсиадага ничә төрле спорт төре кертелгән?

ООО Маяк хуҗалыгының рәисе кем?

Авангард хуҗалагының рәисе кем?

“Ак барс хоккей командасының тренеры?

“ Металлург” хоккей командасының тренеры кем?

Яңа район башлыгының исем, фамилиясе?

Дор. Отдел оешмасының хуҗасы кем?

Уеннан күренгәнчә булганнан бар да була. Белемле, укымышлы әтиләрнең гаиләләре дә ишле һәм үрнәк.

Хәзерге тормышның кыенлыкларыннан курыкмыйча күп бала тәрбияләп үстерүче гаиләләрне, сәламәтлек, уңышлар теләп, алар хөрмәтенә

Җыр: Салихҗановлар. “Алтын алка”

Алып баручы: Бүгенге бәйрәмебездә тагын шундый гаиләләргә тукталып үтәсе килә, болар әби – бабай белән берлектә тату яшәүчеләр. Мондый гаиләдә тәрбияләнгән балалар кешеләргә карата ихтирамлы һәм кече күңеллелекләре белән аерылып торалар. Бу-буыннарның үзара аңлашып, тату яшәүләренең нәтиҗәсе. Әйдәгез әлеге гаиләләр бирегә рәхим итегез (Хөсәеновлар, Шәриповлар, Сәхәбиевлар)

-Әби-бабай белән яшәүнең нинди уңай яклары бар?

Уен:

Хөрмәтле әти-әниләр! Безнең мәктәп коллективы барыгызга да бәхетле тормыш тели; олыларга карата мәрхәмәтле, кече күңелле балалар тәрбияли алсак иде, дигән теләктә калабыз. Шушы теләкләрне хуплап музыкаль номер.

Җыр: Хөсәеновлар. “Урсал тауда” җыры

Еллар үтә, балалар үсеп башлангычтан югарыга күчәләр. Безнең арабызда төпчек балалары башлангычны бетерү алдында торучылар да бар. Алар Зариповлар һәм Шәрипов Илһамнар.

Уен: “Приз уйнату”.

Бию 4 класслар.

Ә менә бу гаиләгә аерым тукталып үтәсе килә.Монда артык сүз сөйләп тору урынсыз. Слайдтагы шигырьне уку да җитә.

Атаң-анаң чутлы булса,

Шундый хәлләр дә була.

Гаиләдәге балалар

Бер үк числода туа.

Әлеге парны бирегә чакырабыз.

-Моның берәр сере бармы?

Уен: Буратино борыны

-Ә хәзер биредә әйтелгән бер номинациягә дә кермәгән гаиләләрне чакырабыз.Сез үзегезгә нинди исем бирер идегез?

Уен: Татар халык бию көенә сумкадан кием алып кию.

Сезне сәламләп җырлый Люция Хабибуллина .

Балаң мәктәптә булган чор

Иң рәхәт бер чор булсын

Аның көн дә мәктәпкә

Барасы килеп торсын

Һәрвакытта гаиләгездә

Татулык хөкем сөрсен

Ходай сезгә гомер белән

Сәламәтлек тә бирсен.

Гаиләләрне без якты кояш белән чагыштырабыз. Һәр гаилә кояш кебек балкып, нурлар сибеп торсын өчен нинди сыйфатларга ия булырга тиеш? Һәр пар берәр сыйфат әйтеп чыксын. ( Нурларны кояш тирәли беркетеп барыла)

Балаларыбызга тигез гаиләдә, сәламәт булып үсәргә, ә безгә-әти-әниләргә-гомер буе балаларыбыз янәшәсендә яшәргә язсын. Һәр ата-ананың үз теләге кабул булсын! Бер-беребезгә ягымлы булыйк, матур сүзләр генә әйтешеп яшик.

Гомер юлларыгыз озын булсын!

Тигез томыш аны бизәсен!

Яшәү дәвере якты көннәр бирсен,

Авырлыклар мәңге килмәсен!

Җыр: “ Балаларның көлүе”