Агрохайысхалаах диктант хомуурунньуга

Оскуолаҕа төрөөбүт тылы үөрэтиигэ болҕомто билигин хаһааӊӊытааҕар да күүһүрэрэ наада диэн тыл үөрэхтээхтэрэ сөпкө бэлиэтииллэр. Үөрэнээччи барыта, маӊнайгы кылаастан саҕалаан, маннык кэрэ, баай төрөөбүт тылын үөрэтэн, ону сатаан туттар-туһанар буоларын ситиһэр наада. Ол иһин алын кылаас учуутала үөрэтэр оҕотугар төрөөбүт тылынан сөпкө саӊарар-суруйар сатабылы иӊэрэригэр улахан ирдэбил турар.
Сахалыы таба суруйар үөрүйэҕи олохсутарга, иӊэрэргэ араас көрүӊнээх элбэх үлэ наада. Оҕону таба суруйарга үөрэтии биир киэӊник тэнийбит ньыматынан диктант араас көрүӊэ буолар.
Диктант үгүс көрүӊүн уруок этабын курдук (15-20 мүн.), оттон хонтуруолунай диктаны уруок устата ыытыахха сөп.
Үөрэтэр-эрчийэр диктант үөрэтэ сылдьар грамматическай матырыйаалы кытта сибээстээх буолар. Оҕо аӊардас истэн эрэ суруйара татым, грамматика сокуонугар олоҕуран суруйар дьоҕур ордук үйэлээх, бигэ-таҕа буолар. Онон диктант сороҕор анал грамматическай сорудахтаах буолуон сөп.
Биһиги оскуолабыт агрохайысхалаах буоларын быһыытынан үлэбит араас өрүттэринэн барытынан агрокомпонены киллэрэбит. Ол курдук ааҕыыга тиэксинэн үлэ, математикаҕа задачалар, онтон тыл уруоктарыгар диктант тиэкистэрин хомуйан биир тиһиккэ киллэрии буолар. Бу ааттаммыт үлэлэргэ барытыгар кылааһынан аттаран, оҕо сааһыгар сөптөөх, үөрэх ирдэбилигэр эппиэттиир матырыйаал хомулунна. Үлэбитин тэрээһиннээхтик ситимнээхтик ыыттахпытына алын кылааһы бүтэриилэригэр үөрэнээччилэр тыа хаһаайыстыбатын (от үлэтэ, дьиэ кыыла, оҕуруот үлэтэ, идэлэр) туһунан уопсай өйдөбүлү ылан орто сүһүөххэ ыытыллар үлэҕэ бэлэмнээх буолуохтара.
Ол курдук, бу хомуурунньукка киирдилэр агрохайысхалаах диктант тиэкистэрэ. Туһааннаах тиэмэнэн учуутал бэйэтэ араас сорудахтары оӊорон оҕо билиитин таһымын билэр кыаҕы биэрэр.