Әниләргә открытка.

Белем бирү эшчәнлекләренең интеграциясе: иҗади сәнгать әвәләү, аралашу, хезмәт, музыка, математик күзаллау.

Максат: Уч төбе белән турыга тәгәрәтеп, тозлы камырдан таякчыклар әвәләп, картон битенә бармак белән басып ябыштырырга өйрәтү; камыр белән пөхтә эш итү күнекмәләрен ныгыту; төсле тозлы камырдан чәчәк ясарга кызыксыну уяту.

Җиһазлау: төсле тозлы камыр, такталар, юеш салфетка, картон бите, таяк-чыклар.

Сүзлек эше: чәчәк, сабак, таҗ яфракчыгы, чәчәкнең үзәге, яфрак, открытка.

Метод алым.

1.Исәнләшү.

-Хәерле иртә, балалар!

-Исәнмесез.

-Кәефләрегез ничек?

-Яхшы, әйбәт.

-Бүген бездә бәйрәм көн. Бүген әниләр көне.

2.Куян баласы Йомшаккай килә. Аның белән танышу.

-Ишетәсезме ниндидер тавыш килә. Нәрсә булды микән? Карыйм әле.

-Балалар, карагыз әле бу нәрсә?

-Бу куян баласы. Аның исеме Йомшаккай.

-Ул безгә каян килгән, Алия?

-Урманнан.

-Димәк, куян урманда яши.

-Куян баласы нинди? – Йомшак, матур, кечкенә, куркак, озын колаклы.

-Балалар, әйдәгез куян баласыннан сорыйк әле, безнең бакчага нинди йомыш белән килде микән? Әллә берәр хәл булган?

(куян баласы тәрбиячегә әйтә).

-Урмандагы җәнлекләр әниләренә бүләк әзерләгәннәр. Минем генә бүләгем юк. Шуңа күрә ярдәм сорап сезнең янга килергә булдым.

-Балалар, Йомшаккайга булышабызмы? – Әйе.

3.Йомгак белән уен.

-Тик иң беренче уйнап алыйк. Без бөтенебездә әниләребезне яратабыз. Минем кулымда тылсымлы йомгак. Тик ул салкын. Шушы йомгакны җылы-тыр өчен безгә әниләргә карата җылы сүзләр әйтергә кирәк, үз хисләребезне белдерергә кирәк.

Әйдәгез түгәрәккә басыгыз. Йомшаккай уртада сезнең сүзләрегезне тыңлап торсын. (балалар түгәрәккә басалар, сүзләр әйтәләр. Минем әнием матур, сөйкемле, ягымлы, назлы, кадерлем, бердән берем, кайгыртучан, мин әнине яратам, булышам, тыңлыйм).

-Менә, Йомшаккай, күрдеңме, безнең балалар күпме матур сүзләр беләләр. Безнең йомгак та ягымлы сүзләрдән ничек җылынган. Шундый җылы сүзләрдән соң әниләрнең күңелләренә дә рәхәт булып китә. Йомгакны мин кәрзингә алып куйым.

4.Өстәл артына утыру. Аңлату.

Өстәл артына утырыгыз. Карагыз, менә открытка. Анда тозлы камырдан чәчәк ясалган. Нинди чәчәккә охшаган?

-Ромашкага.

-Ромашканың сабагы, яфрагы, чәчәкнең үзәге һәм таҗ яфракчыклары бар.

-Хәзер мин картон битен алам. Кечкенә генә сары төстәге камырны алып, уч төбендә түгәрәкләп тәгәрәтәм. Нәрсә барлыкка килде шар. Шушы шарны картон битенә бармак белән басып ябыштырам. Ак төстәге камырны биш тигез кисәккә бүләм. Саныйм бер, ике, өч, дүрт, биш. Бер кисәкне алып уч төбендә турыга тәгәрәм. Нәрсә ясалды? –Таякчык. Шушы таякчыкны шулай ук бармак бите белән басып ябыштырам. Яфракның башын чеметеп кысып куям. Бер таҗ яфракчыгы булды. Рузаль, миңа булыш әле. Камырны уч төбендә турыга тәгәрәт, бармак белән басып ябыштыр, таҗ яфракчыгының башын чеметеп куй. Булдырдың. Диләрә, булыш әле. Син дә камырны турыга тәгәрәтеп, таякчыкны ябыштыр, чеметеп куй. Бик әйбәт. Чәчәкне ясадык. Нәрсә җитми,Айсылу?

-Сабагы.

-Рубин, сабагын ясарга ярдәм ит әле. Яшел камырны икегә бүләм. Бер өлешеннән сабак ясыйбыз, икенче өлешеннән яфраклар. Камырны шулай ук уч төбендә турыга тәгәрәт, картонга бармагың белән басып ябыштыр. Булдырдың. Айрат, яфрагын ясарга булыш әле. Калган камырны икегә бүл. Шулай ук әвәлә. Хәзер бармагың белән ябыштыр. Яфракның башларын чеметеп куй. Булдырдың.

Менә безнең чәчәгебез булды.

5. Ял минуты.

Тик эшкә керешер алдыннан бераз ял итеп алыйк.

Без әле бераз арыдык,

Ял итәргә уйладык.

Башны иябез алга,

Ә аннары-артка.

Уңга, сулга борабыз,

Аннары карап торабыз.

Иң өсләрен сикертәбез,

Кулларны биетәбез.

Бер алга, бер артка сузып,

Күңелле ял итәбез.

6.Балаларның эше.

Кечкенә сары төстәге камырыгызны алыгыз.Уч төбендә тәгәрәтегез. Картон битенә бармагыгыз белән басып ябыштырыгыз. Ак төстәге камырыгызны алып биш өлешкә бүлегез. Самат, ничә өлешкә бүлдең? Санап күрсәт әле.

-Бер, ике, өч, дүрт, биш. Барлыгы биш өлеш.

-Уч төпләрендә турыга тәгәрәтегез. Килеп чыккан таякчыкларыгызны картон битенә бармак белән басып ябыштырыгыз, таякчыкның башларын чеметеп куегыз.

-Хәзер яшел төстәге камырыгызны ике өлешкә бүлегез.

-Динар ничә өлешкә бүлдең?

-Бер, ике. Барлыгы ике өлешкә бүлдем. Булдырдың.

-Шулай ук уч төбендә турыга тәгәрәтегез, таякчыкны-сабакны ябыштыры-гыз. Калган камырны тагын икегә бүлегез. Уч төбендә турыга тәгәрәтеп, бармак белән ябыштырыгыз, яфракларның баш-башларын чеметеп куегыз. Өстәлдәге таякчыкларыгыз белән яфракларга сызык ясагыз. Булдырдыгыз.

7.Йомгаклау.

Менә Йомшаккай, безнең балалар нинди матур чәчәк төшкән открытка ясадылар. Бүген әниләр көнендә әниләренә бүләк итерләр. Ә сиңа бергәләп ясалган открытканы бүләк итәбез, син аны әниеңне котлап бирерсең.

-Рәхмәт, балалар. Миңа китәргә кирәк. Саубулыгыз!

-Саубул, Йомшаккай!