Хәтердә сез, һәлак булганнар! Рәхмәт сезгә, исән калганнар!

А.б.: - Хәерле көн, барыгызгада!

Хөрмәтле кунаклар, кадерле балалар, без бүген сезнең белән “Хәтердә сез, һәлак булганнар! Рәхмәт сезгә исән калганнар!” дип исемләнгән кичәгә җыелдык.

Бу кичәгә без хөрмәтле сугыш һәм хезмәт ветераннарыбызны: Халитов Рәгыйб абый Усман улын һәм Халитова Фәния апа Рахим кызын чакырдык.

Хөрмәтле ветераннарыбыз без бүген сезнең батырлыгыгыз, түземлегегез, сабырлыгыгыз алдында баш иябез.Сезнең язмыш сугыш уты белән үрелгән. Сугыш... Нинди шомлы һәм авыр сүз бу! Ул ничә миллион кешенең гомерен өзгән, күпме баланы ятим иткән, аналарны тол калдырган. Сугыш... Меңләгән шәһәрләр җимерелгән, җир йөзеннән гөрләп торган авыллар юкка чыккан, шау чәчәккә күмелгән бакчалар янып көлгә әйләнгән.